شيئ محيرنى

من فترة كده كام واحد صاحبى إبتدى يسافروا بره يشتغلوا فى نفس الوقت البلد هنا عمالة تبقى أسوأ من زمان وكله دلوقتى عمال يفكر يهاجر فين مش يهاجر ولا لأ .

و بقالى فترة كده بفكر فى السفر بس فيه حاجة هيه اللى محيارنى. هل لما كله يهاجر ويشوف أماكن يعيش فيها كويس أحسن ولا إنه يهتم بالبلد و يقعد فيها . لو سافر و سافر غيره كده ساب البلد للناس التعابنة و الناس اللى مش هتساعد على تقدم البلد و كده البلد عمرها ما هتقوم . وفى نفس الوقت الواحد برضه من حقه يعيش كويس و يلاقى اللى بيقدر مجهوده.

يعنى أنا شايف إن أهم حاجة الناس محتاجها هنا هى الأمل . الناس هنا فقدت الأمل فى إن البلد تبقى حاجة فكله عايز يدور على أمله فى أى حتة تانية . يمكن من الناس اللى كلمونى عن السفر بره و إزاى الناس بتعاملهم كله أجمع على الإحترام اللى الناس بتتعامل مع بعض هناك.

يعنى كان فيه واحد صاحبى بيقولى أنا هعقد فى مصر لو بأخد فلوس كتير قولتلوا هيأخدوها منك مردش . خلاص كله دلوقتى مستنى الضرايب الجديدة الأسعار الجديدة العيش يجيبوا منين إزاى هيكمل أخر الشهر , طب إزاى الناس تبدع فى الشغل فى هي على طول عمالة تفكر فى حاجاتها الأساسية فى حين إن فيه ناس فى نفس البلد مش هاممها إلا إن إزاى تلم فلوس من الناس و هكذا الدايرة تستمر بدون توقف و البلد زى ما هيا

يمكن أنا رأى إن كل واحد من حقه يدور على المكان اللى يعيش فيه ويبدع سواء كان بلده أو غيرها لأن فى الأخر الواحد بيعيش مرة واحدة ولازم يستثمر حياته فى اللى فيه نفع ليه مش يضيعها فى دايرة من المشاكل و يجى لما يكبر يكتشف إن شبابه كان ماشى فيه فى مكانه

الواحد يستحق حياة كريمة مهما كان