أفلا يعقلون

فى الماريوت

كان عندى تدريب تبع الشركة اللى بشتغل فيها يومين فى الماريوت بالزمالك . فندق فعا فخم للغاية ممتاز من جميع النواحى هوا تقريبا كان قصر زمان وحولوه للفندق ده فيه كل حاجة محلات ملاعب حدائق يعنى اللى يقعد فيه ميخرجش منه .
المهم جيه ميعاد الصلاة سألت فين المسجد لقيتوه تحت خالص جنب حجرات غسيل الملابس بتعات الفندق !!! و حجرة صغيرة جدا ... و إيــــــه تدخل تصلى بالبطاقة !!! فيه راجل أمن بره يأخد منك البطاقة قبل ما تدخل تصلى و تستلمها منه و إنت خارج.
تدخل الفندق براحتك و تروح أى حتة براحتك إلا المسجد بالبطاقة.
يمكن الموضوع ده كنت إتكلم فيه قبل كدة
http://mgabr.blogspot.com/2007/08/blog-post_29.html بس أنا لما قابلت الموقف ده قولت أكتبه علشان أؤكد كلامى.
ربنا يهدى الجميع

العودة من العمرة

أخيرا بعد العودة من العمرة رجعت أكتب :D . أنا الحمد لله ربنا وفقنى و عملت عمرة فى العشر الأواخر من رمشان و كانت فعلا رائعة شيئ فعلا لا يوصف . بس و أنا رايح لقيت ناس كتير قوى اللى خامس مرة على التوالى يعمل عمرة و اللى سابع مرة و اللى للمرة ال18 على التوالى . فسألت نفسى طالما الناس بتيجى هنا كل سنة طب ليه تعبانين فى حياتهم و دايما بيشتكوا بالرغم من هنا الدعاء مستجاب و غير كده العمرة للعمرة كفارة لما بينها.
أول ما وصلت عرفت الإجابة :) هوا إن الناس هناك رايحة كده و خلاص مفيش حد رايح كاعمرة كله رايح على أساس ده الرحلة بتاعت كل سنة ( ده الأغلبية طبعا ) . يعنى اللى بيشرب سجاير عند صور الحرم ( كتيييييير ) طبعا الستات بتزاحم الرجالة فى كل حاجة و بتزق و بتزاحم طبعا ناهيك عن البدع و التخاريف و الحاجات التى ما أنزل الله بها من سلطان زى المسح مثلا ( يقعدوا يمسحوا فى الكعبة و أ ى معلم من المعالم الدينية ) ده أنا شفت واحد فى أنا فى مقابر البقيع فى المدينة واحد أخد تراب من القبر وحطه فى جيبه.
طبعا أنا ملمستش الحجر الأسود من كتر الضرب و المزاحمة عليه. انا متأكد إن لو الحرم فيه 2 مليون صحابى كان كل الناس عملت كل اللى هيه عايزاه من غير أى مزاحمة ولا ضرب و أى حاجة بس هنقول إيه .
طبعا برضه الستات تصلى فى وسط الرجالة عادى و نفس كلام الرجالة عادى جدا .
بس ربنا يتقبل من الجميع :d:d
اللى أنا كنت عايز أقوله إنه لفت نظرى حال المسلمين هناك فى المكان اللى المفروض يكونوا فيه على أحسن ما يكونوا لقيت الناس همها تدب الصلاة و خلاص يعنى إسمه صلى التراويح و التهجد وخلاص يروح يأكل بره و يشترى الهدايا و خلاص زى ما قلت فى الأول رحلة كل سنة.
طبعا ده مش كل الناس بس دول الأغلبية بس هيا كانت تفرق مع الناس قليل من العلم الشرعى مش هقوا كتير بس هقول بس الناس تتعلم أى علم علشان متضيعش مجهودها ووقتها وفلوسها على الفاضى.
بس العمرة فى رمضان حاجة تانية التهجد هناك أحسن صلاة صليتها فى حياتى هناك الواحد بيتعلم فعلا يعنى إيه الخشوع فى الصلاة و الدعاء .
ربنا يكتبها للجميع