النهاردة كنت نازل أجيب عيش بلدى الراجل قالى الرغيف بنص جنــــــــــيه!!!!!.ده انا فاكر إنه من كام يوم كان بربع فى الفرن الخاص و5 قروش فى أفران الحكومة دلوقتى شوف بكام ولسه.
وطبعا الناس بصه للحكومة وبتطالبهم إنهم يتصرفوا ويعملوا حاجة وكده. بس أنا ليا نظرة تانية هو السؤال ليه الأسعار عالية علينا قوى كدة هل ربنا راضى بالحال كدة هل دة ظلم للشعب الغلبان.
كنت بشوف برنامج بيتكلم عن الشعب المصرى نزل الشارع وسئل عينة عشوائية من الناس إيه الللى بيميز الشعب المصرى عن غيره من الشعوب أغلب الإجابات قالت إنه شعب طيب و متدين راح المذيع سأل طب ليه الكذب و الرشوة والعرى والكلام ده منتشر فينا.
وده إجابة عن سعر العيش العيب فينا مش فى حد تانى ماهو لو بقينا زي مبنقول كانت الدنيا إتغيرت لينا لكن هو ربنا مش هيخلى لما الأسعار تعلى علينا والحياة تضيق وقت عن التانى وإحنا حالنا مظبوط.
بس الناس شايفه العيب فى أى حاجة إلا نفسها . حتى لو الحياة غليت فعلا فربنا نزع منا الرضا لنفس السبب.
يعنى لا الحياة معقولة ولا راضيين بها وبندور على كل الأسباب إلا السبب الرئيسى...إحنا
