مفيش رجالة - الجزء الثانى

تكملة للكلام السابق نقول النقطة التانية :
ضيق العيش او الرفاهية:
يمكن يكونوا الإثنين متناقضين بس دول سببين لإن الأخلاق قلت . لو خدنا ضيق العيش هنلاقى كل الناس للى فيهم الصفة ديه كل همهم إزاى يجيبوا فلوس أكتر على حساب اى حاجة دينه كرامته أخلاقه أى حاجة بس الفلوس تيجى ولذلك يمكن المثال اللى هضربوا غريب شوية بس ده مثال واضح لحال الناس . الناس فى الميكروباص : كله بسلم نفسه للسواق والسواق يغلى الأجرة براحته ماهو عارف إن محدش هعترض كله عايز يروح وبس يمشى بسرعة رهيبة ومحدش يتكلم ياعم عايزين نشوف أكل عيشنا يركب 100 واحد فى العربية كله يساعد بعضه علشان نوصل ونشيل بعضينا كل إتنازل عن حقوقه علشان يوصل سواء للبيت أو لمصلحته كله بقاتش تفرق معاه واقف ولا قاعد وسايب ست ولا راجل كبير ولا ست حامل واقفة كله كش فارق معاها إنها تقف وسط الرجالة وتزنق فيهم زيها زى الرجالة كل ده مش مهم المهم نوصل وخلاص . طب ما ده عود الناس إنها تفرط فى حقوقها وتحافظ على نفسها فى أى موقف وبالتالى الرجولة قلت إن حد يطالب بحقه ويتكلم .
نيجى للرفاهية خلاص كل حاجة معاه عربية شقة فلوس صحاب من الجنسين عايز إيه تانى مفيش مسئولية منه تجاه حد ماشى معتمد إن أى حاجة تحصل حلها تليفون يطلع الشاب فاضى من جوه غير متحمل للمسئولية طب ده يطلع راجل إزاى وكمان يطلع قليل الأدب ويبجح فلى قدامه صح غلط بس محدش يكلمنى نفس الكلام للبنات اللى من نفس النوع همها كله الموضة الولاد النميمة مين راح فين الفيلم الممثل هيافة زى ده تطلع إيه راجل كويس طبعا لأ
وللحديث بقية

قابيل وهابيل

لما فكرت فى قصة قابيل وهابيل ولدى آدم عليه السلام لقيت إنهم يمثلوا حالنا اليوم .هى القصة إن الإثنين قدموا هدية لله واحد قدم أحسن ما عنده والثانى قدم أسوأ ما عنده ( او على الأقل ليس أحسن ما عنده الشك منى ) بس الإثنين قدموا هدايا واحدة قبلت والثانية لأ.
لو بصينا على حالنا دلوقتى فيه ناس كتير بتصلى لكن مين بطلع صلاته أحسن ما يكون , فيه كتير بينزل يصلى فى الجامع بس هل بيكون على هيئة كويسة وهو نازل ولا نازل بالبجامة . فيه كتير بيجروا على دنيتهم بكل شراسة لكن مين اللى بيجرى على أخرته بنفس القوة . أنا إفتكرت مثال كان الشيخ أبو إسحاق يمشى مع الموضوع قال" الناس دلوقتى لما يتولد المولود ذكر كان أو انثى يقولوا يا رب دكتور مهندس محاسب إلخ لكن لو جاء المولود أعمى يقولك إرموه للأزهر !!! يعنى مينفعش الأزهر يأخد ناس غير أصحاب العاهات " يمكن ده برضوا القرآن حذرنا منها " ويجعلون لله ما يكرهون" . فالناس دلقوتى فئتين يا إما "قابيل"يا إما "هابيل".
اللهم إجعلنا على أحسن ما تحب و ترضى

مين أكتر ناس بتكرهها

سؤال طبعا بالنسبة لينا كا عرب سهل جدا اى حد فى الشارع هيقولك اليهود و يقعد يشتملك فيهم ولكن فى الحقيقة الإجابة غلط!!!
أه قد يكون إنت بتكره اليهود بس فيه ناس بتكرهم أكتر منهم عارف مين ؟
شوف نفسكك كده فى ماتش كورة لمصر مثلا ضد المغرب أو تونس او الجزائر أو أى فرقة عربية تلاقى الناس هتموت و مصر متخسرش من دول بالذات و نفس الكلام الناحية التانية على مستوى الأندية أو المنتخبات رغم إن ده كورة و إحنا عرب بس لأ دول مايغلوبناش والناس تبقى فرحانة أوى لو كسبت مش علشان كسبت لأ علشان كسبت تونس ولا السعودية .
ده لو إحنا هنلاعب إسرائيل مش هيبقى الوضع كدة أو على أقل تقدير نفس الشعور لما نغلب تونس كأننا غلبنا إسرائيل
طب ده كلام و عايزينا نحاربهم وإحنا بنكره بعض زيهم أو أكتر وفين فى الكورة اللى هيا ولا حاجة
نسأل الله العافية

مفيش رجالة - الجزء الاول

الأيام الى فاتت بقيت أسمع كلمة " مفيش رجالة خلاص " " الرجالة ماتوا " وكلام من ذلك القبيل
الصراحة انا موافق على الكلام ده :) .
أنا هنا مش هتكلم عن النواحى الدينية لأن ده السبب الرئيسى والأساسى فى أى نجاح او فشل لأى فرد او مجتمع . لكن هقول ملاحظاتى على حياة المجتمع اللى أدت إن الناس تقول الكلام ده.
أولا : الأغانى :
بغض النظر عن إن الأغانى حرام ولا حلال ( وأنا من الناس اللى مقتنع بحرمتها ) نشوف تأثير الكلام بتاع الأغانى على اللى بيسمعها . دلوقتى كل كلام الأغانى بيدور حول إن الراجل هيموت لو حبيبته سابته لحظة !!! أو لو هجرته يبقى عايز ينتقم أو تبقى سابت فيه جرح كبير و يطلع يعيط فى الأغنية أو الكليب !!! . طب ده كلام و لعلنا نذكر أيام الأندلس لما الأعداء كانوا عايزين يجسوا نبض العرب فاشفوا واحد بيعيط سألوه عن السبب قال نسيت أية أو غلبنى صديقى فى الحفظ ( الصراحة مش فاكر كانت حاجة متعلقة بالدين ) فقالوا مش ده الوقت اللى نهجم فيه و بعد فترة لقوا راجل بيعيط و قالهم السبب إن حبيبتى هجرته فقالوا هوه ده الوقت و بالفعل ضاعت الأندلس.
يعنى إنت عايز تطلع رجالة إزاى وهما بسمعوا أغانى نقول المطربين الرجالة كلهم يا إما مجروح وبعيط ويا إما متنح و هيموت لو حبيبته بعدت عنه و المطربات الحمد الله قايمين بالواجب كله قلع والناس عمالة بتفرج عليهم و البنات بقت بتلبس زيهم ( أو بتقلع زيهم ) وطبعا الولاد عايزين مراتتهم تبقى شبه النجمة الفلانية و البنات عايزة العريس يبقى شبه الفنان الفلانى . و عايز يطلع رجالة كويسة و لا أمهات تربى ولادها وتطلعهم رجالة إستحالة ده الكلام ده بغض النظر عن الدين فى النظر للمغنى و المغنيات و السماع وما إلى ذلك
بس لما الشباب يطلع كل همه حبيبته تبقى جنبه ولا إزاى يلم البنات حواليه و نفس الكلام للبنات وده ( زى ما أنا شايف ) بسبب الأغانى اللى بيسمعوها ليل ونهار خلاص شربوا الكلام بتاعها تحت إسم الرومانسية و الحب و الكلام ده ( وده برضه أهم حاجة فى الإغواء تغيير الأسامى )
أنا فاكر كان فيه واحد صاحبى كان بيحكلى عن إنه سمع مدرسة كانت بتتكلم فى الراديو بتقول إنها سألت البنات اللى عندها فى المدرسة ليه بتلبسوا ضيق كده قالوا لأن الولاد بيقارنونا بالمغنيات اللى بيشوفهم فى الدش .
طبعا الكلام ده المقصود من إنى أبين إزاى كلمة " مفيض رجالة " بقت حقيقة
وللحديث بقية

كيف نجا

سمعت جملة لأحد السلف عجبتنى " ليس العجب فيمن هلك كيف هلك ولكن العجب فيمن نجا كيف نجا ؟!! "
فعلا , لو إحنا شفنا الواقع دلوقتى هتلاقى كل الفتن اللى ممكن يقع فيها أى شاب / شابة بسهولة جدا و متاحة وببلاش من أول النظر الحرام لحد الفعل الحرام سهل قوى .
لكن لو بصينا على إزاى الواحد يفلت من الكلام ده هو ده العجب فعلا , واحد طلع سليم من الحاجات ده كلها .
اللهم إنى أسألك الهداية والثبات على صراطك المستقيم

ياعم ده سنة !!!

من الكلام فعلا اللى بيضايقنى جملة " يعم دة سنة مش حيصل حاجة لو سبتها " " يعنى خلاص خلص الدين كله و مسكت فى ده "
كلام فعلا يدل على عدم إحترام الناس لسنة النبى . فعلا , حاجة النبى - ص- عملها أنت مش هتعملها علشان هو عملها . يعنى بقى تعريف السنة هو أى شيء متعملوش و متخدش عليه ذنوب مش أى حاجة تعملها علشان النبى عملها و تأخذ بيها حسنات كثيرة . اللى يسمع الكلام ده من أى حد تحس إنه خلاص قفل كل أبواب الخير و حجز مكاتنه فى الجنة و مش محتاج خلاص حسنات.
ويرجعوا لما الرسول يشتم تقول نحن فداك يارسول الله يعنى إنت عايز تديلوه روحك و نفسك و مش عايز تديلوا وقتك علشان تعمل فيه السنة بتاعته .... أشك .

دعاء الشرب

قعدت أفكر فى دعاء الشرب اللى بيقول "الحمد لله الذي جعله عذبا فراتا برحمته ولم يجعله ملحا إجاجا بذنوبنا " . لو فعلا إن مقدار ملوحة المياةعلى قد الذنوب , كنا متنا من العطش
حاجة فعلا تدعو للتأمل , الدعاء فعلا جميل جدا و أنا شخصيا بحبه جدا .
فعلا فكر كده شوف أنت بتعصى الله و هو بيديك المياة عذبة فحين لو خدناها من منظرونا إحنا كا بشر مينفعش , لازم يتعاقب بإنى أملح المياة للعاصى , لكن ربنا رحيم ذو فضل عظيم .